29 އޮކްޓޫބަރު 2025 އަކީ މުޅި މާރަންދޫއަށް ވަރަށްވެސް އުފާވެރި ދުވަހެކެވެ. ސަބަބީ އަދުގެ ކައުންސިލުން މާރަންދޫގެ ތަރައްޤީއަށްޓަކައި މި ދައުރުގައި ފެއްޓެވި އެންމެ ބޮޑު ޕްރޮޖެކްޓް ނިންމާ ، މާރަންހިޔާގެ ނަމުން ނަންދެވިފައިވާ އެ ބިނާ ހުޅުވުމުގެ ރަސްމިއްޔާތު ކުރިއަށް ގެންދިޔަ ދުވަހެވެ.
މި ރަސްމިއްޔާތު ވަނީ ވަރަށް ކުލަ ގަދަ ކޮށް ކުރިއަށް ގެންގޮސްފައެވެ. މި ރަސްމިއްޔާތު ޝަރަފްވެރިކޮށްދެއްވީ ހއ.އަތޮޅު ކައުންސިލް މެންބަރު އަދި ހއ.މުރައިދޫ ކައުންސިލްގެ ރައީސް ޢަލީ ޝިނާންއެވެ.
މާރަންހިޔާ އަކީ ކައުންސިލަށް ޢާންމްދަނީއެއް ހޯދުމަށް އަދުގެ ކައުންސިލުން އެޅުއްވި ވަރަށް ފުރިހަމަ ފިޔަވަޅެކެވެ. މާރަންހިޔާ ބޭނުން ކުރެވިގެންދާނީ ގެސްޓްހައުސްއެއްގެ ގޮތުގައި، ރަށަށް އެކި ބޭނުމުގައި ދުރުވާ ބޭފުޅުންނަށް ހިތްފަޞޭހަ ކަމާއެކު ހުރެވޭނެ މަންޒިލެއްގެ ގޮތުގައެވެ.
